Siste hjemmekamp

I årets siste seriekamp på heimebane veit alle kva som gjeld. Med seier både mot Sarpsborg  på søndag og borte mot Haugesund i siste serierunde, held vi plassen i Eliteserien, dersom Kristiansund taper både mot Vålerenga og Tromsø i sine to siste kampar. Viss ikkje dette skjer, vert det kvalikkampar mot eit OBOS-ligalag i desember om å vera i Eliteserien i 2026.

På heimebane har vi vunne seks seriekampar i 2025. Håper at du som les dette møter fram på søndag for å støtta Bryne i å vinna sin 7. kamp. Det er ein sterk prestasjon av eit nyopprykka lag.

Kjøp billett til kampen her

Sarpsborg 08
Som namnet på klubben viser, vart den stifta i 2008, der klubbane Sparta og Sarpsborg FK gjekk saman og satsa for å gje byen eit eliteserielag. Og det lukkast . Alt i 2012 var opprykket klart. Året etter måtte laget ha kvalik for å halda plassen, men sidan det har det vore eliteseriespel på Sarpsborg Stadion. Toppåret var 2017 med 3.plass, og spel i Europa med suksess året etter. Laget har i denne perioden og vore i to cupfinalar utan å vinna, ( 2015 og 2017) men er i år klar for nok ein cupfinale, mot Lillestrøm på Ullevål laurdag 6.desember. Lagets trenar er engelske Martin Foyston som erstatta Christian Mikkelsen i august. Han kom frå svenske Øster, og har lang erfaring som assistenttrenar i svensk toppfotball og i tillegg arbeidd med aldersbestemte landslag i Norge.

Laget ligg på 11.plass på tabellen med 35 poeng og har ein spesiell statistikk på bortebane. Laget har tapt for begge nedrykkslaga Haugesund og Strømsgodset, men vunne mot Bodø/Glimt og Rosenborg. Så det er ikkje akkurat stabilitet som har prega laget på bortebane i sesongen 2025.

Laget
Årets lag er ei god blanding av rutine og relativt nye og unge spelarar. Mamour Ndiaye er klar førstekeeper. Han er berre 20 år, og har spela aldersbestemte landskampar for VM-klare Senegal. I eit 4-3-3-system finn vi den rutinerte nederlandske lagkapteinen Menno Koch (31) som spela tre sesongar i CSKA Sofia før han kom til Sarpsborg 08 i 2024. Med seg i midtforsvaret har han dei siste kampane hatt med seg ein annan rutinert kar, Bjørn-Inge Utvik (29), som kom tilbake til klubben i sommar, etter eit par sesongar i kanadiske Vancouver. Med fortid i Haugesund og Sogndal og seks sesongar i klubben frå 2018-23 har han god erfaring frå norsk toppfotball.

På høgreback kjempar dei to sørlendingane Erik Wichne og Peter Reinhardsen om plassen. På venstreback kjempar svensk-irakeren Mohanad Jeahze (28) som vart henta frå amerikanske DC United i år, med meir kjente Anders Hiim med fortid i Viking og Sandnes/Ulf. Han kom til klubben i 2023. Superveteran Magnar Ødegård som debuterte for klubben som 16-åring, så langt tilbake som i 2009, har og spela fleire kampar i forsvarsrekka denne sesongen. Han har over 60 aldersbestemte landskampar og spela for Molde, Lillestrøm og Tromsø før han kom tilbake til klubben i 2019.

På midtbanen i 4-3-3 har Anders Trondsen teke den sentrale plassen etter at han kom tilbake til klubben i sommar etter fleire sesongar i Stabæk og Rosenborg. Det er hard kamp om plassane på midtbanen. Den unge svensken Almar Sher som har spela for Hammarby, Spezia i Italia og Groningen i Nederland, bergenseren Sander Christiansen, danske Ander Ribe som vart henta frå Portugal i sommar og Victor Halvorsen med fortid i Kjelsås har alle spela på laget i høst.  Harald Nilsen Tangen med fortid i Viking, Heine Bruseth med fortid i Kristiansund og Levanger og danske Peter Carstensen var og på banen i treningskamp mot svenske Ørgryte som laget vann 5-0 sist fredag, så trenar Foyston har mange midbanespelarar å velja i.

På topp kjenner alle jærbuar til Daniel Karlsbakk som har scora 17 mål i Eliteserien denne sesongen. Veteranen Jo Inge Berget (35) scorar framleis mål. Han er mest kjent for dei sju sesongane i Malmø, men har og spela i Udinese, Cardiff., Celtic og New York City, og er mykje benytta som innbyttar. På kantane er Sondre Sørli som vart henta frå Bodø/Glimt i sommar og danske Michel Opoku begge i form. Daniel Job, som har vore på lån i Egersund i år, og Alagie Sanyang med fortid i Moss og KFUM er og spissar, som kan bli å sjå på banen på søndag.

Historikk og spelarar som har spela for begge lag
Eg nevnte i innleiinga at vi ikkje har tap i dei sju kampane vi har møtt Sarpsborg 08. I sommar vart det 1-1 i Sarpsborg etter mål av Daniel Karlsbakk og Duarte Moreira. Dei andre seks oppgjera er frå kampar i Adeccoligaen i 2009, 2010 og 2012. Bryne vann heime 3-1 i mai 2010 og 4-3 hausten 2012 i Gaute Larsens andre kamp som trenar for klubben, med nytt flomlys, utan at vi øydela opprykket for Sarpsborg 08. I 2009 vann vi kampen i Sarpsborg med 3-2 etter ein sein scoring av Ronny Espedal på ei fin heading.

Sarpsborgs Magnar Ødegård var med i kampane både i 2009, 2010 og 2012. I 2012 stod Anders Kristiansen, som faktisk var på Bryne-trening denne veka, i mål for Bryne, medan vår sportssjef Roger Eskeland stod i mål i kampane i 2009 og 2010. Vår naprapat, Ole Martin Tunheim, sat på benken i heimekampen i 2010, utan å koma innpå.

Etter det eg har funne ut er det fem spelarar som har spela for både Sarpsborg  08 og Bryne:

Jørn Hagen, Anders Kristiansen, Jon Helge Tveita, Daniel Karlsbakk og Jesper Gregersen. Dei tre siste er og aktuelle for kampen på søndag.

Kjøp billett til kampen her